CERITE JAK DIDUSUN “NYUSUP LILING DALAM BAKE”

CERITE JAK DIDUSUN

“NYUSUP LILING DALAM BAKE”

Ceriteni sebenarnye kelanjutan ye lah kuceritekah mpaini, ye Anak nantu  nepak pinging mertue betine, gara-gara salah penginaan, ntunye minjam kain anak kerbai. Cerite ye ini same pelakunye anak nantu baru mpai diantat nunggu dangau.

Name nantunye masih kite namekah “Buntak Gedang” tuape diakte masih Buntak Gedang ni benapsu iluk, sawah libagh lah tejawat gale, sampailah mbak kini lah nadak ngtam pule. Biase kalu care adat dusun ye lah diwariksah sejak dikale, kalau nanam padi dipilihlah mulan ye alap biasenye dinamekah bibit padi “Jambat Teghas” entah dimane asal name bibit itu dide bedie tedaftar didinas Pertanian secare nasiunal, anye cucuk ndik diataghan sawah mah “Buntak Gedang”. Padi jamabat teghas ni lame palang mangke masak takarannye ngguk enam bulan mangke ngetam mulai jak ditanamkah, anye hasilnye ngenjuk juge niah, mane beghenas, tangkai sabal ngah panjang-panjang…pukuknye cucukla ndik sawah disitu.

          Karne padi jambat teghas tadi lambat mangke masak, biasenye jeme didusntu nanam pule dikit padi ye gacang masak, mpuk dikatekah dikit sebenarnye itungannye masih banyak, kapuh angkitan sepuluh ambinan galaklah ngitung lebihnye  (maksudnye sepuluh lanjung, kalu lah njadi beghas sekitar sepuluh kaling kire-kire sepikul setengah, kalo dikilui sekitar 150 Kg). sengaje nanam padi ye ndulu masak biasenye bibitnye digunekah bibit padi “putih” atau padi “Ulu Danau” gunenye ndik nyiapkah permakan waktu ngetam kele, karne biasela kalu lah pangke ngetam banyak jeme datang jak dijauh-jauh nulung ngetam ndak dienjuk makan gale, mangke disiapkah beghastu.

Pindik cerite ngetamlah padi ndulu masaktu ndik ngambik jemuan, sengaje nian ngetam pertameni, nyantukah landeghan mbubus tebat kecik lembak dangau kudai, tuape dide lame lah keghing tebat kecik tadi beghikanlah gale tige beghanak, Buntak Gedang, Bininye ye bename Ipah tu, ngah ntunye ye betine yelah ditepuk pinggunge li Buntak Gedang ye keceritekah mpaini… anu kate ntuenye ye betine ngajungkah ipah, peghutilah ikantu ndik gulai kite pagini, aku ndak ngambik’i lilingni kudai alangkah banyaknye lilingni… tuape amu lah diajung li ndunge ndaghatlah Ipah sambil mbawe ikan dalam bakul besaktu.

Siangtu makan gulai ikan campur tempuyak kighiman ntue kecikaan ye begawi njadi guru di Marinimtu…tuape nyantukah landeghan padi lah masak ghulai ikan campur tempuyak dientak pule ulam petai keman, dedesut tige beghanak ngighup.

Udim makan tesadai, lah sedut tulah ndak begawi, anye lah kuciritekah ngah kamu banyakni masih Buntak Gedangni jeme benapsu alias galak ngaguk, udim makan dide lame ige lah kemisut ngambik bake ngah tuai, sesuai rencane kah ngambik jemuan.

Saghitu jeme betigetu ghulihlah ngetam sekitar tige ambinan aghi mpai sekitar jam empatlah pas sembayang ashar… kate ndung Ipah ngah nantunye… Bun, dengah ighiklah paditu mangke pagi pacak jemuw kanye, dide nimbal langsung nantunye tadi ngangkuti padi kebawah tengkiang, lah diighikinye gale, lah petang sekitar jam lime ntunye ndaghat pule ndak besiap balik kedusun,

          Kate ndunge ngah Ipa, pagi gulaikah liling tu kudai, ikan nangkanlah ndik luse, bapang kabah kahbalik pagi kalu itungan aku, karne luse aghi jumat, tadi lah kughendam gale lilingtu tinggal kabah akap pagi mbuntutinye. Kalu pagi panas,  kate ntuenye nujukah umungah ngah Buntak Gedang… Dengah jemuw kalah kudai Paditu…awu kate Buntak Gedang…sambil nunduk, biaselah jeme ngah ntue dik beghani nian ngumung bias.

          Akap pagi ntue betinenye lah kesawah agi, Ipah anak kerbainye dang begetus di dapuw, uji gulai liling tadi, Buntak Gedang lah diparak Tengkiang beguyur jemuwkah padi, ntunye betine nyalangkah punting ye lah keghing-keghing bawah tangge, tuape jeme ndak beranakni rajin gale, tekujat wah ugha iluk didusuntu.  Sate lah masak gale nasi ngah gulai, sambal ngah ghebusan taghuk bikayu lah masak pule, langsung diidangkah li Ipah, makan galelah tige beghanaknia uji nyantukah landengahn gulai liling.

Ntah ngape pule asalnye, liling gulaian Ipahni banyak ye dide pacak disusup, ade juge ye pacak sijat due anye itulah lah ndak beghedangan, Ay Ipah, kate ndunge tadi kaluw kabah kuncah mbasuhe tadi… ngape banyak ye dide pacak disuspni… awu kate Ipah, lukmane kaluw dide dikuncah ndik pacak bersihkanye… kaluw ngulang jangan agi dikuncah lilingni dindak dikuncah, kabah kusuki ngah aghuman, bersih gale die, kalu dikuncah dide die kah pacak agi dusup, pantanganye… dide tau aku nduk… udelah njukah ngah itik saje, kate ndung Ipah.

Tuape kaluw Buntak Gedangni, sate dide pacak disupti, dide nian die ngijekanye agii, lah besamsum makan gulai ghebusan ngah sambal tadi, ngah ade sisa ikan dikit gulai petang kemaghi.

          Udim makan lah lunggukanyelah gale uji li Ipah liling ye dide pacak disusup tadi kah enjukanye ngah Itik ye dikurung parak dangau tu… Kate Buntak Gedang sini lilingtu aku ngnenjukanye ngah ituk, kenyang menangh itik makan liling banyak ni… ambiknyelah liling ye dide pacak disusup tu, kemisutlah tughun kebawah… entah tuape pikiranye Buntak Gedangni, rupenye liling tadi dide dienjukannye ngah itik, bawenyelah keparak tengkiang, serungkupinye ngah Bake Besak…amu jaman dulu namenye “Lanjung” Bake Besaktu, anye mbak kini aghi lah diganti ngah Bake Besak saje, dindak agi jeme ngambin lanjung, begaht ige.

          Ntuenye tadi udim, makan ngah nulungi Ipah bepenyap, langsung ketengah sawah sambil mbawe bake kecik dide singgah agi keparak tengkiang, tuape padi ghulihan keaghi lah dijemuwkah li Buntak Gedang. Lah sekitar sejam bake tadi lah penuh, pikir ntunye tadi, kemane Buntak Gedang ni dide nengah-nengah ape masih diade ighikan katenye tadi lah udim. Beguyurlah Ntunye tadi ngambin padi ndak ngantatkah ghulihan ketamannye, rencanenye nadak ngambik bake besak pule badah nyibuhkah padi…

          Pas sampai kebawah tengkiang, dudkkanyelah ambinan padi bake kecik tadi, udetu langsung ngambik Bake Besak tu…Tuape dikate sate diangkat Bake Besak tu tepelesi peci udim, sambil tepekik…Buntak tuape gawi dengahni… nantunye tadi luk itulah pule same pucat pasi persis luk jagal anjing gile, dide bedagah agi… teguhuw pule anak kerbainye didangaw…Tuape enduk….!!? Sangkenye kalu ulagh kapuh…endunge tadi lah ngencaram marahi Buntak Gedang…segale adelah katenye, pukuknye dide lemak kalu ditulis disini…mpuk itulah pule Ipah bininye…same kencang ngumungtu… udimlah kudai kate ntunye tadi ndak gulai liling…pokoknye mulai saghini jangan agi gulai liling…Anye Buntak Gedang ndiam saje, tuape ame salah, nggak maluan pule…dide bedayi agi…lah memeghap saje, mpuk batin besak.

Nah itulah ceritenye adik sanak, gawi Buntak Gedang beseghungkup nyusupi Liling dalam Bake….laju tekujat…Anak Nantu Nyusup Liling Dalam Bake….hehehehehehehehhe.